02 11 月 日式《Kushi Bar》

麥包係上網睇新聞時見都呢間近期新開嘅《Kushi Bar》﹐就問我想唔想去試下﹐哈哈﹐緊係好啦~﹗

話明係《Kushi Bar》﹐就緊係食串燒(kushi=串燒)為主㗎啦。除咗最常見嘅雞肉串燒之外﹐仲有海鮮﹑牛肉﹑豬肉﹐同埋各種你聽過同未聽過嘅內臟都有。除此之外﹐都仲有各式各樣嘅日式街頭小食﹐好多元化㗎。

你可以揀坐室內或者室外﹔去食嗰晚都幾凍﹐咁我哋就揀咗室內喇。室內裝飾到好似大排檔咁(右圖)﹐加埋陣陣燒烤嘅味﹐會令人食慾大增。

一入到嚟就有一碟爆谷任食﹔D爆谷有少少咖哩味﹐幾得意。

當然要order串燒雞肉嚟試下啦~﹗唔好睇佢冇咩顏色咁﹐其實好好味㗎﹐D雞肉又滑﹐係成晚最好味嘅串燒。

燒雞翼就反而冇咁好味喇﹐唔知係咪因為雞翼難熟呢﹖可能燒得耐咗少少﹐有D”鞋”~﹗

我哋去嘅時候岩岩未過Happy Hour﹐本來USD$3一串嘅海鮮﹐係Happy Hour Menu入面就有好似係USD$12五串嘅海鮮串燒拼盤﹐平咗少少咁啦。

先有不知明嘅白身魚﹐加咗七味粉﹐我覺得有少少”鞋”囉。

呢串鮪魚串燒就OK咁啦﹐但我都係覺得”鞋”咗D。

唔記得咗係串帶子定係另外一種白身魚呢﹖但我記得呢串就唔差嘅。

串燒蝦好好味﹐可以連嗀食埋。

最後嘅呢串燒鰻魚就係呢個海鮮拼盤裡面最好食嘅﹐因為多汁﹐其它嘅都偏乾咗D。

喺Happy Hour Menu入面嘅炸雞塊﹐見到佢平平哋又order埋﹐但就真係同個樣一樣﹐好柴皮喔~﹗

呢個炸蟹肉可樂餅(コロッケ)就好好味喇﹐外脆內軟多汁~﹗

最後order咗碟炒烏冬﹐好美味喔~淨係D柴魚少咗DD咁囉﹐嘻嘻﹗

《Kushi Bar》真係有好有唔好﹐串燒有唔少都比較乾﹐但多汁嘅餸菜都係唔錯嘅﹐睇下你order咩喇﹐哈哈﹗