19 2 月 再次”銀座”聚會

上個禮拜同左個都有一排冇見朋友去食飯﹐因為佢對一間叫”銀座”既日本料理特別情有獨鐘﹐所以今次就揀左去”銀座”食啦。”銀座”之前都有去過架啦﹐上次係食”居酒屋”類型既menu(詳情click呢到)﹐今次我就稔住去試下佢地既”料理”menu啦。

先黎既係”銀座”送既醃黃瓜﹐都OK好味﹐但我覺得佢隻碗比較吸引我囉﹐哈哈~﹗

呢碟係朋友叫既三文魚刺身﹐睇個樣就知道新鮮啦﹔我雖然冇食到﹐但肯定係好好味既。

呢碟係我既雪場蟹壽司﹐唔知係咪隻雪場蟹未完全解凍呢﹖我覺得唔係太新鮮囉﹐残念~﹗

呢煲就勁啦﹐係我朋友點既”北海道毛蟹煲”﹐據講話隻毛蟹係真係係北海道空運過黎既﹔好唔好味﹖我朋友冇咩大既表示﹐但我就覺得個煲有些小貴囉。睇張相以為好大甘﹐但係實際上個煲得四至五吋闊﹐真係好細架咋﹐但就成$19美金…唔~~~

我就叫左個套餐﹐有蒸Halibut﹑炸蝦天婦羅﹑連味噌湯﹑飯同埋沙律。蒸Halibut真係好美味哦﹔炸蝦就OK甘啦﹔味噌湯我朋友以為係佢既﹐就飲左﹐所以我都唔知咩味﹐哈哈。

甜品方面﹐我本來係想叫上次食過好美味既綠茶creme brulee架﹐但佢地今晚冇得賣﹔甘我同朋友就order左呢個不知明既甜品。嘩~超甜呀﹐我同朋友都要囉起係面既勁甜糖漿先食到。

唔~”銀座”係間有好多好好味嘢食既餐廳﹐但亦有唔少”地雷“﹐叫嘢食既時候真係要小心﹐哈哈~﹗