07 6 月 西雅圖的銀座

今晚朋友同我補祝生日，我地就去左間叫”銀座”既餐廳食，揀呢間係因為我朋友話佢地既”綠茶creme brulee”好正，甘鍾意食綠茶食品既我就稔住去試下啦。”銀座”可以話係好多元化，佢由居酒屋既小食、日式拉麵、到正宗日本料理都有得食。我個朋友話想試下多D唔同既野食，所以我地決定先叫居酒屋既小食食住先 –>

一點完菜，就會送上小前菜，係醃青瓜，酸酸地，都幾好味既。

呢樣”龍蝦、蝦卷”係係”日本料理”個本menu到叫既，唔算係居酒屋既野食，但唔知點解係最早上既一碟。龍蝦好好味呀~正~~！

呢碟係menu上寫”炸蟹”，我地點菜既時侯以為係炸蟹肉或炸蟹柳~！嘩~！竟然係炸蟹仔？！真係覺得有D俾人呃既感覺。食落凈係覺得有D脆，冇咩味。

“燒牛舌”，係我個朋友既推介，佢話好好味喔~ 但我食落覺得OK甘啦，唔係話好特別，我覺得燒牛肉會好味D，可能因為”燒牛舌”太乾啦。

呢個係”燒鯖魚”，我未見過甘細條既鯖魚架，得手掌甘大，個presentation仲好靚忝，稔起細個睇卡通片個D炭火燒魚甘，食落唔腥好好味~

唔知係咩？我稔係好似”茶泡飯”甘，但碗飯係”飯焦”，清清淡淡，用黎中和返之前食既煎炸野好岩。

食左甘多樣都覺得唔係好飽，所以我地決定加碗”蜆肉拉麵”黎試下，稔住會飽肚D，唔係埋單就”茸”囉。拉麵既湯底好清，好好味架~

食飽飽後終於輪到期代而久既”綠茶creme brulee”（左），而我朋友就叫左個”咖啡”creme brulee”（右）黎試下。我覺得個”綠茶creme brulee”好好味呀，好有綠茶味架，但唯一美中不足既就係佢既焦糖唔夠薄。如果你問我覺得佢好唔好食？我會話好味架。但如果你問我佢係唔係最好味？甘我就覺得都係係法國食到既正好多~

到最後，係餐廳送既生果，好清甜~！



P.S. 我地食食下既時侯見到隔離臺個個”雜錦魚生飯”（ちらし）好靚呀，好似好好味呀，仲好大份忝，嘻嘻，下次同麥包去試下先~！