20 8 月 結婚一周年紀念 – 慶祝篇

話就話係去慶祝一周年，其實都係去食餐飯嗟，因為個日我地大家都要返工。

晚餐篇

我聽我個同事話有間係湖邊既“Chandler’s Crabhouse”既crab cake好正，啖啖蟹肉，冇咩stuffings。另外我上網搵到係”Westin Seattle”入面既“Coldwater Bar & Grills”有個”西班牙海鮮飯”又好似好好味甘。係同麥包商量過之後，係crab cake勝出，”西班牙海鮮飯”就留返下次先去食啦。上面張相就係”Chandler’s Crabhouse”，個落地玻璃窗上有佢既logo，幾得意呀。個日岩岩落完雨，出面個deck既凳仲係濕既，唔係既話我覺得坐出面，係火爐邊會仲正（我地係坐係落地玻璃窗旁邊）~！

因為早到既關係，我地就稔住飲下野同食住Happy Hour先。佢地既Happy Hour好抵架，好多啤酒、白酒、紅酒、同某D頭盆都係半價。嘻嘻，右邊張相既我就係o係到睇緊食咩好（麥包偷影既）~！麥包叫左杯啤酒，而我就叫左杯白酒。

頭盆1：Spicy Fried Calamari – 我同麥包都覺得一D辣味都冇，個綠色既汁好有墨西哥feel，都幾好味呀。

頭盆2：Chandler’s Dungeness Crab & Artichoke Dip – 呢個Dip我就覺得唔夠上次係“Palomino”食個個甘好味啦，可能呢個佢落得太多cheese，好”滯”，加上佢既Artichoke係切成大大塊既，對於唔係甘鍾意食Artichoke既麥包同我黎講，就唔係甘岩囉。

頭盆3：Tempura Roll – 搞笑，佢地竟然有幾種唔同既roll係個menu到，我同麥包貪得意叫個黎試下。呢個roll有三文魚、吞拿魚、露荀同cream cheese。真係幾好味喔，後來見到好多人都有叫roll，就知原來佢地既roll都唔錯架。


唔知係咪因為個Dip太過”滯”？我地食完呢個Happy Hour已經飽飽地，肯定食唔落每人一個entree，甘我同麥包就決定放棄，就叫左個crab cake大家share算啦。

就係呢個：Jumbo Lump Blue Crab Cake~！我同事果然冇介紹錯，真係有好多蟹肉，直情係100%蟹肉甘，多蟹肉到都整唔似個”餅”形啦，好正，好美味！！


至於甜品呢？因為我已經係間意大利既西餅店到訂左兩份”Petit Four”（奇怪？乜”Petit Four”唔係法國野黎咩？點解會係意大利既西餅店到賣既？），就冇係Chandler’s食啦。但係我見到佢menu度有個叫”Chandler’s Crab Ice Cream”，蟹既雪糕？？嘻嘻，有機會下次試下先得。

網頁：http://www.schwartzbros.com/chandlers.cfm

__________________________________________________________________________

甜品篇

呢間意大利既西餅/雪糕店 – Gelatiamo – 就係我公司附近，我同同事去食飯既時侯經過，聽聞佢既雪糕整得好似意大利既gelato，甘我就去買個黎試下啦。細size既$3美金（貴過係意大利買既$2歐元），仲貴過Häagen-Dazs，有兩個雪球，兩種口味揀。我揀左芒果同開心果。好味就幾好味架，但當然同意大利既唔同啦，少左個種入口即溶既感覺，多左普通雪糕既creamy，我覺得係界乎係普通雪糕同gelato中間甘。但係呢到食唔到gelato，都好過冇，我稔我都會再去食既。又講左去第度忝，講返個”Petit Four”啦。我就係買gelato既時侯，見到佢個蛋糕櫃入面既蛋糕好靚，就問佢囉個menu同訂既方法。但稔落又未食過佢既西餅，唔知會唔會同美國人既一樣 – 甜死人？！都係唔好成個蛋糕買啦。就係呢個時侯，我見到佢個menu度有”Petit Four”賣，但就要一日前訂先得，都好呀，訂兩份就有八件迷你既試下好唔好味，岩晒多心既我。

Tiramisu | 士多啤利果塔

鮮忌廉卷

原味/朱古力味cream puff |朱古力塔/朱古力味果仁塔

全部都好好味架，特別係”Tiramisu”同個”士多啤利果塔”，下次可以試下佢地既大蛋糕啦~！

不日公開既網頁：http://www.gelatiamo.com/

__________________________________________________________________________

番外篇

美國人既集俗係會將結婚蛋糕最頂既個層留返，凍結係雪櫃；到左一周年紀念個日令返出黎食！哈哈，我地都有將我地個蛋糕令返出黎，但就決定”公諸同好”，叫埋麥包既屋企人黎見証呢個”壯舉”，試下係咪真係食得！個答案係：食得，但唔好味~！下圖係婚禮當日既；右圖係一周年紀念日既。唔好以為係發霉呀，因為個蛋糕係”綠茶Tiramisu”，所以先係甘既色。

伸延閱讀：結婚一周年紀念 – 禮物篇