04 2 月 《RMK》彩妝

返香港嘅時候除買咗一堆MTM之外﹐仲喺RMK買咗少少化妝品。第一樣想買嘅就係唇彩﹐因為用開嘅就嚟用完喇。皆因我買唇彩/唇膏買嚟買去都係買差唔多嘅顏色﹐就算係唔同牌子都會係咁。因為咁﹐我去買嘅時候心目中已經有咗想買嘅色﹐但係又唔知點形容俾個sales聽喎﹖RMK嘅化妝小姐好好人﹐佢聽完我好抽象嘅形容之後﹐好有心機咁同我試咗我都唔記得咁多隻色﹐仲係隻隻都試上嘴㗎﹐到最後終於揾到喇~ service真係惦~﹗

↓ 麥包喺出面等我等到無聊嘅時候影嘅。

最後買咗嘅唇彩同唇膏各一支。唔好睇佢哋好似咁紅咁﹐搽落嘴到係淺色好多㗎~﹗支唇彩係由三隻唔同色組成﹐搽起嚟係淡淡嘅橘紅色﹐好似最上面第一張相﹐盒唇彩上面個心形咁嘅色。

唇膏本來冇諗住買㗎﹐但諗吓諗吓屋企有支冇咩色嘅閃令令唇彩﹐就咁搽會太淺色﹐就買支唇膏嚟打底用啦。呢支唇膏比唇彩深少少﹐用嚟搽少少做打底就岩岩好喇。

用咗好多年嘅T’estimo眉墨(eyebrow mascara)絕咗版﹐要揾過另外一支。上網見人哋話RMK嘅唔錯﹐就試下喇。試上眉覺得比T’estimo嘅更易上色﹐可能係刷頭唔同嘅關係啩﹖好用又買埋。

最後﹐化妝小姐話我如果買多HKD$50就有一盒唇彩送﹐咁我就好直接咁問佢咩係$50蚊嘅﹐佢就話不如買盒HKD$80嘅卸妝棉啦﹔我諗住HKD$80就有多盒幾得意﹐又幾靚嘅唇彩﹐咁又OK喎。另外綠色嗰支就係試用裝既face scrub。

RMK 網頁﹕http://www.rmkrmk.com