04 11 月 [東京] 第三日Part III – 大江戶溫泉物語
行左成日，都有D肚餓同累，就去《大江戶溫泉物語》入面食野同浸返個溫泉啦。因為夜晚既入場費差唔多係朝早既半價，所以我地覺得夜晚黎抵好多。一入到去，咩都唔知，樣樣野都有D估估下甘。先黎就係除鞋同張對鞋擺係鞋櫃到，好似卡通片入面D小學生返學甘，入門口就換鞋。跟住就去俾錢入場，我地竟然去左出口個邊，好彩有人話我地知者，哈哈~
！
俾完入場費就係揀浴衣時間，我本來係想揀件黃色既，但佢話冇我size喔，因為黃色個件凈係有160cm以下既size~！甘好啦，我揀過件粉紅色架啦，點知粉紅色個件都係一樣，冇160cm以上既size
！唉~ 甘到最後，只係揀到件我唔係好鍾意既紅色。等我搞左一輪之後，麥包已經揀好啦，甘我地就分別入男、女更衣室換衫啦。
入到去見到入一排又一排既櫃俾放用品，但係個個都鎖住左既？唔通全部都滿晒？但冇咩可能架？有甘多櫃，點會全部滿晒呢？唔通要囉鑰匙既？甘我又走返出去問過，哈哈，真係瘀
，原來條鑰匙就係係我地俾入場費個時，個個人綁係我地隻手到個個牌入面~！好啦，搞左一輪，換完衫之後，出到去見到麥包，我就問：『你搵唔搵到條鑰匙開儲物櫃呀？』麥包就話：『搵到呀，係隻手個牌到呀嘛。』唉呀，凈係得我甘豬忝~
！
好肚餓啦，去搵野食先。我地行晒全場之後覺得呢間叫《麵吉》既拉麵好似幾好味，就每人叫左一碗，加碟煎餃子食。碗拉麵唔錯，好彈牙；碟煎餃子就真係細隻左少少，但佢俾既醬汁就好好味。
醫飽肚之後，我地就周圍影下相，可能係夜晚既關係，唔係好多人，所以我地用腳架都OK。睇下相啦。
跟住我地行左陣舖頭後就去浸溫泉啦。先黎就係去可以同麥包一齊浸既露天”足湯”，因為係露天既關係，又凈係浸到對腳，真係覺得有D凍架。”足湯”入面有唔同大細既石頭，聽講話係上面行會幫助血液循環，但係我只係見麥包行到面容扭曲，而我行左兩步就放棄啦。
入去大浴場（男、女分開既）浸溫泉啦，麥包話佢唔去啦，甘我就自己去啦。入面有好多個唔同既浴池，當然冇箱根既甘靚（遲D講），但都真係唔差囉。人唔算特別多，浸得好舒服架
。但我浸完出黎，麥包竟然話我知佢都去左浸？哈哈，原來佢本來係想入佢睇下既，但入到去人地好好甘俾條毛巾佢，甘佢又唔好意思就甘出番黎，就去左浸喔。嘻嘻，我地都覺得浸完真係好舒服喔，返酒店都特別好o訓~
！
《待續~》
No Comments