20 8 月 結婚兩周年紀念 – 慶祝篇 + 禮物Part I

時間過得真係好快﹐又到咗我同麥包嘅結婚兩周年紀念日喇~今個結婚週年紀念本來係諗住喺馬爾代夫過嘅﹐但因為種種原因﹐要延遲三個月先去得﹐不過無所謂啦﹐因為嗰時會係我哋拍拖八週年紀念﹐都係週年紀念﹐差唔多嗟﹐嘻嘻。咁橫掂遲少少去旅行﹐而家就少少哋食餐飯先啦。

今次我哋揀咗呢間名叫《BRASA》嘅地中海菜食。我喺幾年前嘅舊公司聖誕party嗰時嚟過一次﹐講真﹐已經唔記得咗食過咩同埋係咩味囉﹐嘻嘻﹔至於麥包﹐佢就未嚟過。今次揀呢間嘅原因係我同麥包都好鍾意食”西班牙式焗飯”﹐想嚟試下佢哋嘅好唔好味。

右圖睇落係咪有少少似白酒呢﹖CHEERS~﹗哈哈﹐其實係【Duche de Longueville Sparkling Cider】同埋【Kumquat Dry Soda】﹐兩杯都係冇酒精㗎。杯Dry Soda幾得意﹐好似有桔味嘅有氣礦泉水咁。

【PAELLA – Chicken, shellfish, house-made chorizo】

呢個就係我哋想試嘅”西班牙式焗飯”喇﹐但同我哋想象中有好大出入﹗第一﹐我哋以為會好大碟﹐但出嚟個portion好細﹔第二﹐我哋覺得D飯係黃色﹐比較乾身﹐但呢碟係紅紅啡啡咁﹐比想象中嘅濕。雖然係咁﹐但味道都幾好㗎﹐特別係佢有好多﹑好多料﹐正﹗

【Steak Frites】

呢碟牛排加薯條﹑沙律就好大碟喇。我哋叫咗”medium rare”﹐出嚟嘅效果似”medium”多D﹐岩我﹐麥包就覺得熟咗少少。塊牛排好似有醃過咁﹐唔駛沾醬都好好味﹐但點埋佢嘅不知名醬汁就仲正~﹗至於D薯條就外脆內軟﹐係好好味嘅薯條﹔沙律都好新鮮﹗成碟嘅美味程度係正過佢嘅外表嘅~﹗

【Cataplana Fish Stew】

呢樣係我哋個waitress嘅推介﹐大慨就係咖哩海鮮咁啦。喺邊邊嘅薄餅點埋D咖哩汁好美味﹐我哋食完之後再叫咗D包嚟點埋D咖哩汁添。

【Spanish Fried Doughnuts】

甜品就OK啦﹐係炸doughnuts舔熱朱古力﹐唔食太甜嘢嘅我覺得有少少過甜﹐但麥包就覺得岩岩好。

另外我之前嗰日買咗北海道十勝紅豆雪糕﹐諗住做夜晚喺屋企嘅甜品嘅﹐但真係食得太飽﹐就留返第二日先食﹐美味喔~﹗

※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※ ※

至於禮物方面﹐都係去旅行前嘅小小心意啦﹐我同麥包都分別送咗張卡俾對方﹗先講麥包送俾我嘅﹕

(註)﹕唔記得咗上次張卡嘅你﹐可以click呢到睇返 – 結婚一周年紀念 – 禮物篇﹐呢兩隻龜對我哋嚟講好有意思㗎。

收到真係好感動喔~﹗麥包基本上係個唔識浪漫﹑唔識搞氣氛嘅人﹔但今次真係好有心思﹐特別係佢而家返工忙到飛起都仲用咗唔少時間去揾返張卡﹐幸福滿滿喔﹗

另外再加多張Godiva嘅gift card﹐等我幾時想食士多啤梨Cone就可以去換~﹗

而我送俾麥包張卡嘅封面就係兩條紅心底底﹐嘻嘻﹐千祈唔好諗埋一面﹐入面係寫住﹕”You made a great pair!” 見佢幾搞笑﹐就買咗喇。

其實有時小小嘅心意﹐就可以滿滿喔~﹗多謝麥包俾咗個好甜蜜嘅結婚周年俾我~﹗

P.S. 麥包另外仲有送Jill Stuart嘅化妝品俾我﹐下篇待續~