07 12 月 [京都] 第八日Part V – かに道楽

《かに道楽》係日本有好多分店，我地就揀左去係”河原町”既”京都本店”到食。今日朝早叫酒店既concierge幫我地訂左六點，我地去到先知原來佢幫我地訂左”個室”（私人房），呵呵~真係好貼心喔。

未講食蟹之前，先講下搭車既小插曲啦~本來係《清水寺》搭車去”河原町”好快，十五分鍾左右就到，但係唔知點解搭車個時我以為我地係去”袛園”，今次真係搭錯車啦，仲要懵到去到”袛園”落埋車先知自己搭錯車，哈哈，麥包都頂我唔順囉~！所以又一次證明好似我甘大懵既人買One Day Pass係岩既~！甘我地又搭過第部巴士去”河原町”啦。

一入門口就有個著和服既靚女reception，我同左佢講我地訂左六點；跟住唔知係邊到又有另外一個出黎幫我地收埋對鞋（呢到係需要除鞋先入得去既）。

睇下我地間房先~門口有我個名，係和室設計，好有情凋；唔駛跪係到食，張檯下面係空既；房唔算好大，但我地兩個人就好夠用咯。最重要係好private，食蟹食到冇咩儀態都冇問題。

我地叫左兩個套餐，一個係個時既”秋季限定”既”網焼会席”，而另一個就係係普通menu上揀既，我已經唔記得點個套餐包邊樣野啦，甘就由上菜既先後次序黎講啦。

先黎既下『季節の前菜』 – 有魚餅同埋蝦。蝦係有mayo同魚子嘮過既，好好味；魚餅就同普通既魚餅差唔多。

『食前酒』 – 唔會太大酒味，反而有少少果汁既感覺，幾好味架。

『かに酢』 – 酢蟹 – 個汁係酢黎既，好似食中式蟹舔酢甘，好好味喔~。

『かに造り』 – 跟住呢個係蟹刺身，有兩個唔同既擺盤，但D野食係一樣既。個蟹刺身係我地覺得全個套餐最好味既，好鮮甜架。

『大ズワイかに網焼き』 – 炭燒雪場蟹，相入面個個就係我地既靚女”市應”啦，佢非常之溫柔架，把聲仲好甜忝。哈哈~就係因為有佢，麥包覺得餐飯都特別抵食忝~嘻嘻~佢幫我地將D蟹同埋配菜放上個炭爐到，同我地講話D蟹變白色後就可以反轉佢，烤多一陣就食得架啦。

靚女走左，到我黎煮啦~呵呵~

煮好啦，食得~炭火燒既係唔同D，好有BBQ味，舔埋係蟹蓋上面既”昆布味噌”醬（唔係蟹膏黎架，我都想 / 更正:原來日文既蟹膏都係叫”味噌”﹐所以係蟹蓋上面既”昆布味噌”醬係真係蟹膏加咗昆布味嚟㗎~﹗），又或者舔鹽同籮白泥（我稔係籮白泥卦？）都好好味。

『かにサラダ』 – 沙拉加埋日式醬汁，清清地，唔錯、唔錯。

『かに茶碗蒸し』 – “茶碗蒸”入面有蟹、蝦同埋…唔記得啦，哈哈，不過好味，D蛋好滑。

『かにグラタン』 – 芝士鋦蟹，有好重既芝士味，我覺得唔係甘食到蟹味，同埋都幾”漏”下。

『タラバかに揚出し』 – 酥炸黃帝蟹，好大塊，有啖啖肉既感覺~

『かに天ぷら』 – 蟹天婦羅好好味，唔會話有”油淋淋”既感覺，連配菜都唔差。

『かに寿司』 – 全部都係蟹肉整既壽司，我既至愛就緊係最右手邊個個”蟹肉刺身”軍艦壽司啦，好美味喔~可惜得一個，麥包冇得食。

『かに釜飯』 – 蟹肉鋦飯，D飯好有蟹味，熱辣辣，正~！

其實食完D蟹壽司時侯我地已經好飽架辣啦，食埋個飯就真係飽到飛起~但又好好味喔，所以我地都清晒佢。

『吸物』 – 蟹肉清湯，真係好清，飲唔出有咩味，哈哈~但佢既魚阪都係蟹既樣，好得意喔~



睇下我地既食相：食第一、二道菜既時侯，我地都好”斯文”架，用晒刀、叉甘。跟住麥包就話：『我地係咪同隻蟹做緊手術呀？』到後來，用”做手術式”食法可能到天光都未食完，我地都係用返”原始人式”食法（用手）好D。

『デザート』 – 到食甜品啦~是日甜品係芒果布甸。

『アイスクリーム、お抹茶かけ』 – 呢個係雲呢拿雪糕加即席沖既穠縮綠茶汁，有好穠既綠茶味。由又熱又帶甘味既綠茶，撞又凍又甜既雪糕，個口感好得意。

係埋單既時侯，我同麥包都稔緊駛唔駛俾貼士呢？雖然睇旅遊書話日本係唔駛俾貼士既地方，但又真係唔知佢係話食碗拉麵唔駛俾呀？定係話度度都唔駛俾呢？甘我地都係覺得俾好D，佢唔收先算咯。個結果係：佢地真係唔收架，所以我就用本來稔住俾貼士既錢去買左個Kitty啦，哈哈，重有錢找返忝。



飲飽食醉後，我地就搭巴士返酒店，”拿拿臨”執埋行李，聽朝晨甘早五點幾就要起身，去搭六點幾既新幹線返東京，之後就搭10:00am既”浪漫特快”去箱根囉~。

箱根見~

呢篇比較多相，睇唔到既話就試下”refresh”多次啦。

《待續~》