28 10 月 [日本] 第一、二日 – 出發、到步

《10月08日至10月09日》

終於出發啦~！平時既我每次返香港都會帶個大行李既，因為次次都會買唔少野返黎；但今次因為會去日本，又會換幾次酒店，就想輕便D，所以之前個晚用左唔少時間去將我地既野擺落兩個手提行李到，搞到好夜先去o訓。好彩第日12點機，都唔駛好早起身。今次係由麥包既細妹送我地機，甘趁朝早有時間，奶奶又想去飲茶，我地就去左飲茶啦。飲完茶之後就去機場，機場都唔算多人，唔駛幾耐就過左customs， 仲有好多時間剩。

既然有時間剩，麥包又好勤力甘溫書啦。





上到機既第一餐飛機餐（亦係我唯一記得影相既飛機餐），如常啦，空姐都係問：『Chicken or beef?』，我揀既係雞扒伴薯茸。但其實我係個唔食飛機餐既人，甘多年以來我都係食個餐包，加少少如果好味既沙拉或配菜就算，所以如果問我個餐好唔好食，就要問麥包先知啦，因為佢次次都食埋我個既。今次既配菜唔錯，係cocktail shrimps，哈哈，我就食埋麥包個份啦。

因為西雅圖同日本有十幾個鐘頭既時差，加上坐飛機又要十幾個鐘既關係，雖然我地八號就出發，但係去到日本已經係九號既下晝五點幾啦。過關俾預期快，唔洗半個鐘頭就過完關兼囉埋行李啦。

第一件時就係去換JR Pass，我地搵左一陣就見到對面有個好大既牌寫住係個到換JR Pass，甘我地就入去啦；有幾個人係到排緊隊，我地又排。我稔排係我地前面幾係對台灣人，佢地手上搾住本講Suica + N’EX既優惠小冊子，我心稔：『哈哈，係呢到仲可以買埋呢兩樣野，唔洗周圍搵，正！』等左一輪之後，終於輪到我地啦，但當我俾張JR Pass既voucher俾佢既時侯，佢竟然同我講話呢到冇JR Pass換喔？！佢話係係隔離個間先有得換！（之後我地出返去睇過個大牌先發覺之前睇漏左個箭咀指住隔離個間先係換JR Pass既，搞笑。）但既然都排左隊囉，咪稔住買左個Suica + N’EX先啦，個sales就好好人甘同我講，話我有JR Pass，係咩JR都坐得囉，甘係唔洗晒錢買Suica + N’EX架啦。哈哈，跟住我又同佢解釋返話我張JR Pass凈用得7日，但我會留係日本9日，所以先會買Suica + N’EX。到最後，佢終於明白啦，就好快甘幫我地出票。我地甘講左一輪，真係要對後面排隊既人講聲唔好意思啦。之後我地又快快甘去隔離換埋JR Pass就上車囉。

N’EX坐得幾舒服架，唔知係咪夜既關係，車廂幾空下，坐係我地後面既一班人係到飲啤酒同食小食，好似好好味甘，但我地因為時差，都唔肚餓，所以咩都冇食到。

個幾鐘頭後就去到品川，跟住就轉山手線去到目黑坐酒店既接駁小巴去酒店啦。呢間酒店雖然唔係係新宿、原宿，但係因為有酒店接駁小巴，都算方便。房內要有既野都有，但我唯一覺得唔係好好既就係佢既花灑灑水太勁啦，沖起上黎會覺得有D痛。沖完涼都好夜啦，o訓覺啦~

第二朝，等緊接駁小巴既時侯，我地先去大堂睇下。大堂方面裝修得好靚，出面有個日式花園，我地去影相既時侯仲見到有個好似model既人係到影緊相忝。

好啦，出去玩啦~！

《待續~》