20 4 月 馬爾代夫﹑等我~﹗

終於決定咗啦﹐今年十一月麥包同我去馬爾代夫再度蜜月﹗


經過一輪嘅資料搜集﹐再一輪嘅格價﹐我哋決定咗先返香港﹐再join香港嘅六日四夜package(機+酒)去馬爾代夫嘅“One&Only Reethi Rah”﹐會住一晚馬列過境酒店﹐O&O嘅沙灘屋同埋水上屋各兩晚。由於會搭新航﹐係新加坡轉機﹐咁就利用轉機嘅時間去埋新加坡一日遊(5/14/08更新﹕兩日一夜遊詳程看﹕緣下的新加坡之旅)。最後﹐留返係香港嘅時間應該係一個禮拜到。

等我慢慢講下呢個決定嘅由來啦﹕

時間﹕本來我哋想係淡季(五月至十月)嘅時候去﹐因為好多酒店嗰時都會有優惠﹐好似住幾晚就送一晚咁。但無奈我六月﹑七月﹑九月同十月都係busy season﹐加埋我兩個老細都咁岩一齊七月開始放三個月嘅產假﹐佢哋話明我個幾個月如果冇咩事嘅話就”最好”唔好放長假喎﹐咁就連八月都唔得。麥包就話咗佢九月同十月係busy season﹐都唔得㗎啦。咁就即係淨返五月啦﹐而家大部分馬爾代夫五月嘅酒店都full晒﹐真係唔駛諗﹔同埋我都唔想咁趕﹐好似岩岩先放完大假冇耐﹐又話放過唔係幾好嘅。就係因為咁﹐就唯有揀十一月淡旺季去啦。雖然係貴咗少少﹐但希望十一月由雨季轉旱季﹐咁落雨嘅機會會細D啦（但而家D天氣咁反常﹐好似西雅圖咁﹐上個禮拜先熱到著短褲﹐今日又凍到落雪添）。

酒店﹕睇過好多酒店同埋人哋嘅遊記之後﹐我narrow down到”W Retreat & Spa Maldives”同埋”One&Only Reethi Rah”呢兩間。我好鍾意W沙灘屋嘅覆式設計﹐上層有個好大嘅鞦韆﹐人哋話坐係嗰到睇日落好正﹔加埋佢嘅免費小食站同透明獨木舟都好吸引。而O&O水上屋嘅水上吊床（下圖）﹐佢屋與屋之間嘅私密度高﹐同埋出名service好﹐都係一樣咁正。係覺得好難揀之際﹐聽到有人話佢兩間都去﹐都係貴$4,000幾港紙(因為需要坐多程水上飛機去W)。呵呵~咁咪唔駛揀囉。我又去問旅行社﹐咁住【兩晚W沙灘屋+兩晚O&O水上屋】同住【兩晚O&O沙灘屋+兩晚O&O水上屋】差幾錢﹐佢話我知兩間都去嘅話就會貴$20,000港紙喎~﹗嘩﹐乜事佢報俾我個價會貴過人哋嘅咁多㗎﹖後來搞清楚先知個$4,000係五月嘅差價﹐但十一月就旺季開始﹐所以會貴好多。唉~咁就算啦﹐我都係淨去O&O好啦(其實都可以淨去W嘅﹐但我諗真係揀嘅話我鍾意O&O多D)﹐留返D錢去參加島上嘅活動好過。

機票﹕基本上﹐係西雅圖飛馬爾代夫係非常咁轉析嘅﹐最快都需要轉三次機﹐坐二十幾個鐘頭先到﹐我都唔敢想象坐完會係點嘅樣呀。都係返香港先﹐一嚟可以探下屋企人﹐二嚟又唔晒一次過坐咁耐機﹐三嚟計落機票仲平咗添。

價錢﹕好老實講﹐真係唔覺得平﹐我諗以呢個價﹐馬爾代夫95%以上嘅酒店都住到﹐有大部分仲可以住多幾日添。但係諗到我嚟緊嘅幾年都唔會去咁遠嘅旅行﹐咁拉勻嚟睇都OK啩﹖加上去馬爾代夫﹐我想住得好少少(麥包心聲﹕「你去邊到都話要住好D㗎啦。」)﹐同埋好耐都唔會再去過嘅﹐唔想有咩遺憾。

多謝朋友J上個禮拜幫我去俾錢落咗訂(九月先俾埋尾數)。遲少少就訂埋返香港嘅機票﹐睇下O&O島上有咩活動好玩同諗下做唔做spa﹐再睇埋新加坡有咩好玩同好食﹐就搞惦囉。


呵呵呵~期代﹑期代~﹗