※08年11月22日※

話說朋友J喺FB到無意中揾返一個我哋好耐都無聯絡嘅朋友C﹐就趁住我返香港期間大家約出嚟見下面。另外﹐仲約多咗個都有一排無見過嘅朋友I出埋嚟。講真﹐未見之前我同朋友J都有擔心過唔知大家會唔會無話題講﹐話晒我同朋友C自小學畢業後都無見過喇﹐你話係咪好耐呢﹖所以都驚見返會覺得怪。但事實證明﹐我哋嘅擔心係多餘嘅﹐成餐飯唔單止無冷場﹐大家仲傾得非常投契﹐就好似番返小學嘅時候咁﹐不竟大家以前都係好好﹑好傾得埋嘅朋友。而家諗返﹐先覺得唔知我哋會唔會太大聲﹐噪襯隔離檯呢﹖

↑ 朋友C星期六都要返工﹐我哋成兩點幾﹑三點先見到面食lunch﹐餓到發癲嘅我同朋友J都點咗上圖嘅『鰻魚柳川風飯』。第一次食鰻魚丼飯(うな丼)上面加入蛋汁﹐好似親子丼咁﹐但雞肉就變咗鰻魚﹐好好味。其餘嘅味噌汁同醃菜就唔記得咩味喇﹐哈哈﹐太投入傾計。

＊＊＊＊＊＊＊＊＊

← 我哋揀嚟呢間食lunch就係因為想食佢嘅『抹茶慕糍巴菲』﹐咁我同朋友J又點埋同一樣。入面有抹茶雪糕﹑雲呢拿軟雪糕﹑紅豆﹑白玉慕糍(もち)等等﹐好美味喔。

＊＊＊＊＊＊＊＊＊

↓ 下圖就係朋友C點嘅『芝麻醬鮮蝦冷麵』﹐賣相OK﹐不過我無問到好唔好食。

一場幾個鐘頭嘅飯局﹐食得開心之餘﹐亦對昔日嘅朋友了解多咗﹐喺言談之間知道咗一D其他人嘅近況﹐有D都幾驚訝㗎﹐但係朋友C仍然係同以前一樣爽朗﹑無咩點變﹐真係一件令人開心嘅事~﹗

下次返香港再見~﹗

《麻布茶房》
海港城2608-2610號鋪

※※※※※※※※※※※※※※※※※※※※※※※※※※※※※※※※※※※※※※※

同場加映﹕

因為食過加蛋汁嘅鰻魚飯覺得好好味﹐咁我喺屋企就試煮嚟食﹐都唔錯㗎。