15 7 月 鎧塚俊彦- Sweet Figure Part 2

六月尾嗰時ebay send咗個email嚟﹐話送可用三次﹐每次唔超過$10美金嘅免郵費優惠﹐呵呵﹐咁即係$30啦~我就即刻上ebay睇下有咩想買喇。免郵費嘅優惠最好就用嚟買好似Re-ment呢類型郵費貴貴嘅嘢﹐嘻嘻。我分別同兩個賣家買咗幾盒Re-ment(詳情睇呢到)同《鎧塚俊彦Sweet Figure 2》入面嘅其中兩盒。

鎧塚俊彦(Toshi Yoroizuka)係日本好紅嘅甜品大師。佢有八年時間喺瑞士﹑奧地利﹑法國﹑比利時等地嘅工作經驗﹐2004年返日本之後﹐就係恵比寿開咗佢第一間日本嘅甜品店﹔大獲好評下﹐又係2007年係六本木Mid Town開咗另一間分店(好想去食喔)。而呢套有六款嘅食玩就係用佢嘅甜品做主題(其實呢套已經係第二彈嚟㗎喇﹐之前都出過另外一套六款嘅甜品)。

「Anja（アンニャ）」- ほんのり酸味が心地よいリュバーブタルト
一件睇到個樣就好想食嘅甜品﹐整體同上色都好精細。

「Role（ルレ）」- 苺の純白ロールケーキ
日本人好鍾意嘅士多啤利﹐又係好似好好味。

講到各家食玩嘅size嘅話﹐Megahouse就最細﹐跟住到Re-ment﹐而呢套鎧塚俊彦就最大喇。

成個包裝都好靚㗎﹐除咗個盒整到好似蛋糕盒咁﹐可以就咁放係到display之外﹐仲可以將個甜品放係附送嘅透明套到做吊飾添。