14 5 月 機緣下的新加坡之旅

因為今年去馬爾代夫會坐新航﹐咁會係新加坡轉機﹐所以我哋原本嘅plan就諗住襯轉機嘅時間去新加坡半日遊喇。但喺揾新加坡資料個時先知原來我哋有好多新加坡嘅嘢都想食喔~﹗跟住麥包就同我講﹐話我哋有咁多嘢想食﹐得一日﹐就算去得晒﹐個肚都食唔到咁多囉。加上﹐我同麥包有個大學同學(麥包同佢熟D)而家係新加坡返工﹐咁我哋又諗住去探下佢喎﹔同佢講起個時佢又係問點解唔留耐D﹖仲有﹐我嘅信用卡積分又夠換晚酒店喎﹐咁就算喺新加坡留一晚都唔晒錢。喺咁多誘惑之下﹐我都有D心思思想留耐D。

但因為我哋已經去旅行社落咗訂﹐咩都book好晒﹐都唔知而家改機票需唔需要加錢﹖鑒於去馬爾代夫已經洗唔少錢﹐如果要再加錢改嘅話﹐我就諗住算㗎喇。因為唔係好清楚香港嘅旅行社係點﹐所以就send咗個email去問﹐嘻嘻﹐又好好彩喎﹐佢話而家仲改得﹐唔駛加錢﹐哈哈﹐咁我哋就決定改早一日去新加坡﹐將半日遊改成兩日一夜遊喇~﹗

【同分類下一篇】：【新加坡】- 序