22 11 月 [東京] 第七日Part I – Häagen-Dazs、向京都出發

《10月14日》

今日係係東京既最後一日，晏晝就會去京都啦。係未去之前，我同麥包再一次去新宿行下同埋搵野食。而今日岩岩係星期日，Häagen-Dazs係新宿呢間分店就有佢既650円五個唔同口味既雪糕球優惠，我地就緊係要去試下啦。間舖頭係”小田急エース”入面，都幾難搵下架，但問左幾個人都好快搵到。入到去我以為就甘order就得啦，點知原來係需要填紙仔既。張紙仔印有好多唔同味道既雪糕名，揀好五種之後俾佢就得架啦。

有五個甘多，而每個size都真係唔細架，我同麥包share都夠晒囉。係我地食緊既同時，見到有個細細粒既日本女仔自己一個人都order左五個，勁喔~！

講返我地揀左咩味啦。有紅豆牛奶（アズキミルク）、芝麻（ブラックセサミ）、意大利白桃子（イタリアンホワイトピーチ）、綠茶（グリーンテイー）、同埋番盆子忌廉（ラズベリークリーム）。除左番盆子忌廉味之外，其它全部都係美國無既口味，隻隻都好好味架，我覺得好食過美國既多多聲。

—————————————————————————-

食完我地就返酒店checkout，跟住就去品川站搭新幹線去京都啦。新幹線基本上有兩種唔同型號既車；下左圖車頭好似個鴨頭甘既就係”のぞみ”，係而家時速最快既新幹線；而下右圖就係”ひかり”同埋”こだま”，兩種既分別在於”ひかり”凈係停大站，”こだま”就停比較多既站，相對地亦係最慢既新幹線。

因為我同麥包係用JR Pass，所以係唔可以搭”のぞみ”既，甘我地今次搭既就係”ひかり”既指定席。入面好整齊、好乾凈，每排位都好寬趟。唔知係咪指定席既關係，車廂內唔會好多人，成程都坐得好舒服。

睇下有幾快啦~

京都見咯~

《待續~》