10 9 月 免費潛水相機

過兩個月就去馬爾代夫喇﹐前一排麥包想買個岩我哋個相機(SONY T7)用嘅潛水殼﹐諗住去影Nemo。但我哋個相機太舊喇﹐連個潛水殼都己經無出好耐囉﹗都有上ebay揾過﹐諗住都係用一次﹐平平哋嘅話都好吖。但個潛水殼唔多之餘﹐就算有都bid到好貴﹐覺得好唔抵﹐因為平時真係冇咩用。

跟住我哋就諗﹐不如買個近期新出嘅潛水相機﹐用完之後賣返出去都平過去bid個舊嘅潛水殼﹐quality可能仲會好D添。真係好好彩﹐就係我哋去鋪頭睇完潛水相機款之後嗰日﹐麥包就咁岩揾到個人賣兩個全新嘅潛水相機﹐因為佢買咗第個﹐所以就好平咁賣咗俾我哋﹗兩個都係同牌子嘅﹐一個係入門版﹐另一個就係入門版嘅step up﹐好少少啦。

我哋諗咗好耐﹐諗keep邊個好﹖最後決定喺ebay賣咗個貴嘅﹐賺到嘅錢就多過我哋用嚟買兩個相機嗰D﹐嘻嘻﹐咁就有個唔駛錢嘅相機喇﹐仲有錢賺添。因為會放落水﹐咁就算一個唔好彩﹐爛咗都冇咁心痛嘛~

講到影出嚟嘅相嘅quality﹐喺未買之前我上網睇review都知唔係話好好㗎喇﹐但佢賣嘅就係防水嘅function﹐岩我哋嘅需求﹐都OK嘅。

【同分類上一篇】：奧運明信片

【同分類下一篇】：日本手信=萬聖節手信﹖