23 6 月 住家新菜式

今日麥包出發去咗芝加哥﹐上為期一個禮拜嘅annual training﹐而我就喺屋企過咗一個好清閒嘅星期日﹐等我聽日先寫我今日點過喇﹐因為仲執緊相。麥包唔係屋企嘅日子我都好少會煮飯嘅﹐因為一個人(一個懶人)真係冇咩incentive去整嘢食。以下嘅嘢食係前個排整嘅﹐個個都係新嘗試﹐都唔錯﹐都食得㗎﹐哈哈~﹗

『香煎比目鱼面頰』 – 睇落係咪好似雞扒咁呢﹖我諗呢條比目鱼一定好大條﹐淨係塊面頰都已經咁大喇。可能因為大條嘅關係啦﹐佢嘅魚肉冇普通比目鱼咁幼滑﹐食落嘅口感有D似帶子﹐可以一絲絲咁撕開食﹐都OK好味㗎。

『香腸番茄意粉』 – 番茄意粉就整過好多次﹐但今次就係第一次冇用買返嚟預先調好味嘅醬汁﹐而係真係自己用新鮮番茄﹑洋蔥﹑羅勒(九層塔)整嘅﹐麥包話唔錯﹐不過我就覺得下次多返D汁會好D﹗

『海鮮明太子意粉』 – 呢個之前整過㗎喇﹐但今次加咗少少蒜茸﹐好味﹑好味。

【同分類上一篇】：雜錦散壽司飯

【同分類下一篇】：章魚燒(たこ焼き)