18 4 月 羅浮宮來的展品

由二月開始﹐西雅圖嘅SAM(Seattle Art Museum)會有為期幾個月﹐名為”Roman Art from the Louvre”嘅展覽。據講呢批來自法國羅浮宮嘅展品係從未係歐洲以外嘅地方展出過。個時聽到之後覺得好吸引﹐都想去睇㗎﹐但就覺得二十蚊美金一個人有D貴囉﹐特別係D展品可能係上次去Louvre嘅時侯已經睇過㗎啦(但係我肯定唔會記得)。就係因為咁﹐本來我哋都冇諗住去睇㗎啦。但係有日返工﹐無意中見到個廣告﹐原來3月28日係Corporate Member Day﹐如果你公司係SAM嘅Corporate Member嘅話﹐你就可以免費入場啦。咁岩我同麥包公司都係Corporate Member﹐我哋就可以唔洗錢去睇﹐。另外﹐仲有兩個朋友都話有興趣﹐咁麥包就囉多咗兩個pass﹐齊齊去睇囉。

個日放工之後﹐我哋就先去醫肚﹐係SAM附近一間叫”Typhoon”嘅泰國餐廳到食Happy Hour。因為當日冇帶相機﹐以下既相係用手機影嘅﹐影得唔係嘅靚。”Typhoon”嘅嘢食都唔錯﹐但就略厭細碟咗少少﹐食好多碟都唔飽咁。

————————————————————————–

(上左至右)【Happy Hour Menu】【沙爹串燒雞配飯】【炸鮮蝦雲吞】
(下左至右)【泰式牛柳漢堡】【炸魷魚圈】【泰式青木瓜沙律】

————————————————————————–


食飽飽之後就去SAM啦。我同麥包都覺得個展覽場地太細﹐展品亦唔多﹐總之就係同喺Louvre好唔同嘅感覺啦。但我哋嘅兩個朋友就覺得好正喎﹐仲睇得不知幾興奮﹐哈哈﹐可能係我同麥包唔識欣賞啩﹖不過又唔駛錢﹐去睇下都所謂嘅。