01 11 月 [東京] 第三日Part I – 寿司大

《10月10日》

話說之前個晚因為時差唔覺得肚餓，冇食野就o訓左覺；今朝一起身個肚就打鼓啦，所以就去築地市場搵野食醫肚先。

我地唔係好早起身，所以都冇稔過可以睇到晨早魚市場賣魚，或者擋魚既情況，我地十點幾去到既時侯個魚市場已經收晒，變得好靜。一去到，第一個感覺就係：『果然係魚市場，有陣陣既魚腥味，好有香港街市既感覺。』我地太肚餓啦，先去搵野食。其實食野既地方都係集中係幾條街入面，呢幾條街除左有食市之外，都仲有小食、手信賣。每間舖頭都真係幾細架，睇相就知啦。我地行左一個圈，好明顯，有兩間（《壽司大》 & 《大和壽司》）係特別多人既，正確黎講，應該話係有兩間多人到需要排隊，而另外既就有好多冇人入去。我地本來都冇稔住排隊既，但係麥包話，既然黎到，又人人都排隊，而家唔試既話，佢驚我遲D會後悔，又會返轉頭黎食過，甘就唔好啦。哈哈，甘又係，我可能真係會甘，所以都係去排隊啦，甘我地求其揀左間《壽司大》。當我地係《壽司大》門口排左一陣既時侯，排係我地前面既人同我地講，話其實個龍尾係係路邊。原來佢地係唔想排隊既人龍排到隔離間舖頭左住人地做生意，所以門口只會有十幾個人，分三行排，之後既人龍就排係路邊。我地去到既時侯都好彩架啦，只係係路邊既第二對人，係我地等左一陣後，就多左好多人黎。好搞笑，人人都以為龍尾係門口，甘話俾人知龍尾係邊既就變成排門口最尾既責任啦。

排排下，唉呀，有D頭暈眼花既？我稔係因為前個晚冇食野，加上個到時不時有運魚既車經過，帶黎陣陣魚腥味，所以覺得唔係幾舒服。甘麥包就去買左團子(だんご)俾我食，食左就好好多啦，繼續等~！

等到去門口排隊啦，有個好似係老板娘既黎問我地食咩，其實99%既人都係揀三個套餐既其中一個。

套餐有：
おまかせ寿司―3670円 （10件 ＋ 自選1件 + 1巻物）
特上寿司―3150円 （8件 ＋ 1巻物）
上寿司―2000円 （7件 ＋ 1巻物）

我同麥包就揀左”特上寿司”同”上寿司”，好彩冇揀到”おまかせ”，唔好睇凈得幾件，但係食完真係好飽、好飽架。

等左成個鐘頭後，終於輪到我地啦，入面真係好細架咋，只得一排十幾個位，有三個壽司師父，其實稔落佢地三個要即場整十幾個人既壽司，都好忙喔。一入到去，佢地就會好好笑容甘同你打招呼，仲話要你等甘耐唔好意思忝。

箭嘴指住個個就係整壽司俾我地食個個啦，亦係我覺得最好笑容個個。壽司方面，真係食得出好新鮮；我覺得最得意既就係，D飯粒好鬆軟，當你覺得令起佢個時實散既時侯，佢又唔會架喔~總之就係同我之前食既壽司係好唔同啦。

先講下我食既”特上寿司”先啦：

（左）大トロ – 好好味，油脂好豐富，真係入好即溶 （中）白海老 – 師夫話唔好點豉油食既，都好好味 (右)不知明既魚 – 好腥呀~！唔岩我。

（左）ばふんうに – 好新鮮，真係唔腥架 （中）甘い海老 & 巻物– 又係好新鮮，正 （右）玉子焼き – 都好味，但冇咩特別囉

（左）好似係貝類既野 – 麥包食左，應該係幾爽既（右）穴子 – 好甜，好似饅魚甘

麥包既”上寿司”：

（左）中とろ （中）生さんま – 麥包話幾腥架喔，睇個樣都似 （右）吻仔魚 – 我食左，好甜好味

（左）まぐろ （中）さば – 麥包唔記得咩味啦（右）另外一種好似係貝類既野 – 我食左，好爽、好似象拔蚌甘

春子鯛 & 巻物 （同我既一樣）

（壽司相太細，可以去相簿睇大D既。但顏色就影得唔係甘靚，因為好多人，唔好意思用閃光燈）

我覺得呢餐，除左個兩件腥既，唔岩我地口味之外，大多數都好好味，同埋都食到幾多平時好少食到既壽司~ 到最後，個壽司師父仲同主動話同我地影相忝。甘我同麥包咪笑笑甘稔住影啦，但佢叫我地搾住個有大大個《壽司大》既杯黎影，真係識賣廣告啦，哈哈~！

《待續~》