【香港】家常便飯於《金滿庭》



※08年11月09日※

《置地文華》high tea完之後﹐急急趕去時代廣場嘅《金滿庭》同屋企人食飯。點解咁趕﹖因為知道《金滿庭》日日都好多人(睇吓下圖就知)﹐本來想六點就到﹐食第一輪嘅﹔但原來佢五點九就俾人入去﹐我哋去到六點岩岩滿晒﹐等咗成四十分鐘先有得食。

《金滿庭》係集京﹑川﹑滬於一身嘅中菜食府。聽唔少朋友話唔錯﹐咁就同屋企人去試下啦




《金滿庭》入面嘅裝修都幾特別﹐天花板上面有個用竹造﹑唔知係魚定係船嘅吊飾(上圖)﹐另外門口又有個假嘅兵馬蛹(左圖)﹐幾得意吖。

↓ (下圖)餐具方面就好有中國色彩喇﹐不過唔係好明佢寫緊咩



睇下食D咩先﹖我就話岩岩去過high tea﹐唔係好肚餓﹐但我諗其他人一定好餓㗎喇。

『蔥油海哲』-唔記得邊個點嘅﹐OK﹐都幾好味。

爸爸點嘅『賽螃蟹』﹐好美味喔~﹗

『京醬肉絲』-食落就好似炒豬肉絲咁﹐放入一個好似空心叉燒酥嘅餅入面(叫”叉子燒餅”)一齊食。我覺得鹹咗少少。

我點嘅『蟹粉豆腐』﹐好多蟹粉﹐美味喔~﹗

舅母點嘅『上海素齋』﹐我覺得有D怪味﹐媽咪就話係我食唔慣一種豆嘅味道喎。

媽咪點嘅『松子桂花魚』﹐麥包好鐘意食﹐我就OK﹐可能最後先上﹐我嗰時都已經好飽喇

『酸辣湯拉麵』﹐好味﹐但真係好辣﹐淨係得麥包食到﹐哈哈﹐岩晒佢

最後仲有一籠『一口小籠包』㗎﹐都好好味﹔但唔知係唔記得影相﹖定係唔小心delete咗﹖所以冇相post出嚟。食咗咁多嘢﹐埋單都唔貴﹐《金滿庭》真係一間岩食家常便飯嘅地方﹐都幾抵食㗎~﹗

《金滿庭》
銅鑼灣時代廣場
食通天10樓1002號舖

【同分類上一篇】:【香港】置地文華《Mo Bar》下午茶
【同分類下一篇】:【香港】Le Salon de Thé de Joël Robuchon
No Comments

Post A Comment