最近迷上的GYROS



近期睇得人哋嘅法國遊記多﹐令我諗返起喺巴黎食過嘅 “gyros”。Gyros係源自希臘嘅食物﹐喺pita bread入面有牛同羊肉﹐加埋蕃茄﹑洋蔥﹑tzatziki醬等等一齊食。最特別嘅就係D肉係好似左圖入面咁串起嚟燒﹐食嘅時候就用刀刮出一片片薄片嘅肉﹐再放落個grill到燒一燒先擺入pita bread入面。法國嘅版本就有少少唔同﹐唔係用pita bread﹐而改用放入法國麵包裡面﹐加埋薯條一齊食。雖然用咗羊肉﹐但一D騷味都冇㗎﹐連唔食羊肉嘅我都食到。


※Above picture obtained from Wikipedia

↓ 記得喺西雅圖一個shopping mall入面有間快餐店有賣gyros﹐去開行街時就同麥包去試下美國版嘅。呢間快餐店賣嘅好明顯係比較”健康”嘅多菜少肉版本。唔知係唔係要”快”嘅關係﹐D肉一早就已經切晒落嚟﹔我就覺得冇咗成塊肉串起嚟燒嘅gyros就好似冇咗gyros嘅風味囉﹐但食落都ok嘅﹐不過真係好少肉﹐同埋唔係好夠熱。



↓ 之後麥包上網揾到間叫”Mr. Gyros”﹐網上好多人都話好好味﹐咁我哋又去試下。間鋪頭好細間﹐但就有好多人排隊排到出門口買喎﹐我嗰時諗﹕「咁多人﹐都應該好味啩﹖」果然冇令我失望﹐呢間嘅gyros真係好好味喔~﹗佢真係你order嘅時候先用刀刮出串喺到燒緊嘅肉﹐之後會再grill一下﹐熱騰騰﹐好好味。我哋order咗個套餐﹐有埋薯條同飲品﹐薯條整得外脆內軟﹐加埋芝士係上面食﹐美味喔

P.S. “Mr. Gyros”入面嘅佈置真係好似我哋間大學旁嘅好多食市咁﹐好有番返以前讀書時代嘅感覺~﹗

【同分類上一篇】:08平安夜之韓國燒烤
【同分類下一篇】:【新加坡番外篇】《馬來沙爹屋》
No Comments

Post A Comment