05 1 月 08年聖誕溫哥華飲茶-《釣魚台》

08年聖誕麥包有四日假放﹐而我就有三日﹐加上燃油費平過上幾個月一半﹐美金對加幣又升返唔少(終於唔係一對一啦﹐開心喔~﹗)﹐又係去溫哥華剪頭髮嘅時候喇~﹗(今次淨係麥包剪﹐我冇剪)

今次我哋同埋99去﹔因為西雅圖上兩個禮拜係咁落雪﹐99都冇咩點出過街﹐喺屋企悶足個幾禮拜﹔仲有﹐諗落我哋都好耐冇同過佢行街﹐咁今次就叫埋佢一齊去溫哥華喇。

99鐘意去飲茶﹐咁我哋去到就先去《釣魚台》飲茶喇。我同麥包都唔係話特別鐘意飲茶﹐所以《釣魚台》開咗咁耐我哋都冇嚟過﹐今次係第一次。《釣魚台》俾我想像中細好多﹐我諗我誤會咗﹐以為《釣魚台》係隔離嗰間《四季火鍋》(下次試下先)。

(左圖) – 等我睇下有咩食先﹖我哋得三個人﹐真係唔駛order太多。我睇嚟睇去都唔知食咩好﹖最後都係99搞點。
(右圖) – 未有嘢食住﹐麥包就幫我同99影返張相。

【香茜牛肉腸粉】嘻嘻﹐麥包唔食蝦﹐所以就order咗牛肉腸﹔都OK好味﹐但就冇咩特色咯。

好似叫【帶子菠菜魚肉餃】﹐有帶子鮮味﹐加上D魚肉又好新鮮唔腥﹐好好味。

【鮮竹卷】99一家都好鐘意食﹐但就唔係我杯茶﹐嘻嘻﹐所以講唔到好唔好食。

【蟹籽帶子魚腐】- 真係唔知”魚腐”係咩嚟﹖食落有少少似魚蛋咁﹐都幾好味㗎。

【生炒糯米飯】- 99點嘅﹐呢碟糯米飯炒得好清香﹐唔會話食兩啖就飽~﹗

之前話我點心就揀唔到喇﹐但我就睇中咗呢個牌上面嘅推介~﹗

影相唔係好睇得到﹐但係真係有唔少龍蝦喺粥入面﹔龍蝦好新鮮彈牙﹐粥就因為吸咗龍蝦味變得好香好甜﹐正呀~﹗

99幫我同麥包影嘅相~

【同分類上一篇】：溫哥華一日之旅-《客滿庭》

【同分類下一篇】：08年聖誕溫哥華上海菜-《旺》