03 9 月 可不可以天天出去玩

喺無名無意中揾到台灣漫畫家彎彎嘅部落格﹐睇咗幾篇覺得好搞笑﹐好岩用嚟減壓﹐就係咁﹐我開始咗睇佢嘅部落格喇。

今年七月佢出咗呢本名為『可不可以天天出去玩』嘅漫畫﹐內容係講佢去唔同地方玩嘅趣事。上半部係台灣各地﹔下半部係世界各國﹐包括日本(京都&沖繩)﹑泰國﹑中國(北京&廣州)﹑香港﹑馬來西亞﹑新加坡等等。

首一萬本係特別版﹐分別有桃紅色嘅沖繩版同埋粉綠色阿里山版﹔之後賣嘅就係普通版。特別版同普通版嘅分別在於佢哋有唔同嘅封面。

我去咗「紀伊國屋」訂咗特別版﹐但就冇得揀係沖繩版或阿里山版﹐係除機分配嘅。我覺得兩個封面都OK﹐所以收到邊本都無所謂。但當我去「紀伊國屋」囉書嗰時﹐原來佢哋自己都有訂咗幾本特別版嚟賣﹐兩個版本都有﹐咁我就有得揀喇﹐哈哈。

我揀咗嘅係桃紅色嘅沖繩版﹐就咁睇個封面好似一片桃紅色﹐咩都冇咁。

但如果你用佢本書送嘅一個透明卡片放上個封面到﹐你就會見到有公仔出現啦~﹗但張卡片同個封面要對岩個角度先睇得清楚﹐都唔係咁好玩㗎咋。

(題外話﹕呢張相我影咗好耐先影到張OK嘅﹐因為又要對張卡片同個封面嘅角度﹐又要對到個相機鏡頭岩影~)

如果覺得對嚟對去好麻煩嘅話﹐只要拎開個封面﹐內頁就有印刷得好清楚嘅封面圖睇喇。

裡面係全彩色印製﹐彎彎嘅畫風係好簡單易明﹐又好搞笑添。係本唔駛點用腦去睇嘅書。

【同分類上一篇】：日本人真妙-東京OL求生術

【同分類下一篇】：新書推介