20 12 月 [箱根] 第九日Part III – 箱根吟遊 – 房間篇

之前咪講過話《箱根吟遊》係好難訂房既，我早左九個月訂其實都係訂唔到我原本想訂既房。事源係甘既：《箱根吟遊》有四種唔同類型既房，分別在於房間同房內露天風呂既大細。我覺得間房細D都唔緊要，最重要係個風呂夠大，唔可以同屋企個浴缸差唔多。而係二樓最平個間房就有呢個問題，所以我稔住訂中價位係三樓或者四樓既房就OK架啦，但係我訂既時侯，凈係得返係一樓既豪華房，稔黎稔去，都係訂啦，橫掂都係一晚，就”豪”左佢啦。
而家稔返都係覺得個決定係好既，因為呢類型既房會有兩個風呂係房到；一個係好大、用石頭整成既露天風呂，而另外一個就係室內既銅風呂，有唔同既體驗既。

就等我同麥包介紹下間房啦~！

房間係分成六個部份既，分別係玄關、大廳、飯廳、洗手間，浴室、露天風呂；成間房大約1000尺到啦。

玄關部份唔記得左影相，甘就講大廳先啦。廳中間有張好矮既日式檯加坐氈，旁邊有電視機、DVD機等等。呢度亦係夜晚舖日式”ふとん”（futon）係”たたみ”（tatami）上面訓覺既寢室，佢地會係你食晚飯甜品既時侯入黎為你舖好架啦。

由大廳既左手面行過去就係飯廳，我地既早、晚餐都係係呢到食既。係飯廳既一邊放左部LCD電機同DVD機，但我稔緊坐係背住電視個個人（亦即係我）點睇電視呢（下右圖）？所以我地食飯既時侯都係聽佢地獨家既純音樂CD，都唔錯架，好soothing。仲有，好彩佢張餐檯既設計係可以放對腳落去中間個凹位到，唔係我地食個餐三個鐘頭既晚餐就慘喔~！哈哈哈~

飯廳開門出去就係露天風呂，唔知個dimension，但我覺得都真係唔細囉。睇下面兩張圖就會見到朝早係露天風呂望出去既景色，而左圖就係夜晚打燈時見到既竹林。因為對面都係山，所以唔驚人地會見到你。但係，麥包試過行到最近竹林既地方望上面，係可以見都二、三、四樓既露台架（佢地既露天風呂就放係露台）；雖然係唔見到佢地浸溫泉既（你就想啦），但係難保佢地伸個頭出黎既時侯唔會見到我地間房近竹林既地方囉，所以我地浸溫泉既時侯都係會留返係有棚架遮頭既露天風呂同沙發既地方。

係露天風呂隔離就係用玻璃整成既浴室，有日式沖涼既細木桶同木凳，如果用唔慣日式，都仲有西式花洒可以用。而係埋入面既仲有室內既銅風呂（左圖），都唔細架，起碼坐得落兩個人。係銅風呂對外既就係套沙發，浸露天風呂覺得太熱時可以上黎坐下。

由玻璃浴室行入房內個邊就係洗手間。個面盆係銅色既（唔知係咪真既銅黎呢？），而佢地提供既護膚品都有分男、女；女仔個邊既係Kanebo同Shiseido既產品，都唔錯架。

睇完房之後，我地既server就囉左綠茶、芝士蛋糕、同埋一粒好似係好出名既梅黎俾我地食。綠茶好好飲，芝士蛋糕都好好食，但麥包話粒梅就好酸喔~呵呵~好彩我冇食到。緊住個server就同我地約好食晚餐同聽日早餐既時間（因為係係房食，佢想搵個你覺得最方便既時間先囉野入黎俾你食），就走左啦。嘻嘻，等我地黎浸下溫泉先~






《待續~》

§箱根§ – 第九日Part IV – 箱根吟遊 – 溫泉篇