[東京] 第五日Part I – 麻布十番 – あべちゃん

《10月12日》
1613186273.jpg
唔知係咪尋日行左成日,今朝o訓都好晏先起身,換完衫都成十一點啦,早餐都慳番,直接去《麻布十番商店街》到食晏囉~!朝早既《麻布十番商店街》好寧靜,可能好多舖頭都未開門或者準備緊開門,係到好舒服,同係新宿、原宿既感覺好唔同。但聽講一到夜晚就會好熱鬧,好多人,仲會不時撞到明星忝。所以麻布十番食晏就好抵,但到晚飯時間又會係另外一個價囉。


一出地鐵站口行冇幾耐,係街頭(定係其實係街尾?)就見到間我地識既舖頭 – Koots(右圖),係西雅圖都有間架,原來真係日本人開既連鎖店黎既。我地想去食串燒既《あべちゃん》仲有十幾分鐘先開門,所以我同麥包就係周圍附近睇下野先啦。行過一間便利店,見到有小丸子係學校先日都食既面包夾”焼きそば”,就稔起麥包都好鍾意食”焼きそば”,就叫佢買黎試下。麥包果然好鍾意,嘻嘻~!



由商店街轉個彎就去左民居,真係好似日本,覺得睇日劇條街熟口熟面甘,好有日劇feel。講開,呢到好近六本木既《朝日電視台》,唔通D日劇真係有係呢到取景既?麥包買野飲呢個”自動販売機”係日本真係隨處可見。另外,我地仲見到呢間好出名既百年老字號《永阪更科》,係食蕎麦麵既;我同麥包到係食肉獸,唔岩我地食~嘻嘻。

《あべちゃん》終於開門啦~。日本人真係好準時,佢地會睇住個鐘,make sure一夠鐘就開門。無論係外在或內在既裝橫都好簡陋,但係就好乾凈,肯定唔會令你覺得唔舒服。佢地既lunch定食好平,如果我無記錯既話,應該係550円一份,包蓋飯、湯各一碗,同埋醃菜一碟。




1613186279.jpg



我既串燒定食,有燒雞兩串、同魚蛋一串。唔係講少,真係好好好好味。




1613186278.jpg


麥包既牛雜定食,都好好味,我好鍾意佢多汁既飯;但就唔夠串燒甘正。




《あべちゃん》真係好平民feel,冇特別既service,但店內既每個人都好親切。食飽飽,去六本木ヒルズ囉。

麻布十番商店街網頁:http://www.azabujuban.or.jp/

《待續~》

【同分類上一篇】:[東京] 第四日Part III – 新宿迷路
【同分類下一篇】:[東京] 第五日Part II - 六本木けやい坂通り、六本木ヒルズ、朝日電視台
No Comments

Post A Comment